Pantsættelse af to Boder paa den vestre Side af Tyskemannegade (Skoboderne).
//
Omnibus presens scriptum cernentibus Johannes Petri de Ymmerthorp, armiger, salutem in domino. Nouerint vniuersi presentes et futuri, quod recognosco me a veris heredibus liberis cuiusdam Nicolai dicti Hannyn, quondam villani Hafnensis, pie memorie, triginta marchis argenti in alba et concaua pecunia Lubicensi bone monete et datiue integraliter percepisse, pro quibus triginta marcis argenti predictis ipsius Nicolai Hanyn liberis vnam curiam cum fundo et edificiis, videlicet duas tabernas in vico et angulo in occidentali parte a communi platea dicta Thytheskemannegade sitas et mihi prius per quendam Johannem Geddensten dudum villanum Hafnensem felicis memorie pro predictis triginta marcis argenti etiam currentis monete et datiue rite impigneratas, vna cum omni iure meo et apertis litteris, conditionibus et articulis mihi super hoc confectis dimitto et resigno totaliter per presentes. In cuius rei testimonium sigillum meum vna cum sigillis honorabilium virorum, scilicet domini Henrici Krøyer, domini Nicolai Jacobi de Glathsaxe, presbiterorum et perpetuorum vicariorum in ecclesia Hafnensi, et Jacobi wan Møllen, villani ibidem, presentibus est appensum. Datum Hafnis anno domini mcdxxij profesto exaltationis sancte crucis domini nostri Jhesu Christi.