Erkebiskop Absalons Stadfæstelse paa Frue Kirkes Tiende.
//
Absalon, dei gracia archiepiscopus Lundensis, Svecie primas, apostolice sedis legatus, vniuersis comparochianis de Haffnis salutem et dilectionem paternam. Relatu patris vestri spiritualis et pastoris, Eskilli videlicet, percepimus vnamini consensu et pia deuocione, terciam partem uestre decime de annona uos omnes contulisse ecclesie beate Marie ad constructionem et decorem domus Dei. Ne igitur a uoto pietatis et bono proposito cuiquam resilire liceat, hanc paginam sigillo nostro corroboramus precipientes, quatenus de cetero nullus uestrum decimam predictam subtrahere presumat, nisi preelegerit a catholica communione priuari. Ualete.