Kjøbenhavns Diplomatarium

Bind: II
Side: 52-55
Nummer: 37

Guldsmedenes tydske Gildeskraa.

Allen lyden zy witlik dat na godes gebort do men schreff verteynhundert vnde in deme negentwintegesten jare de irluchtigeste hochgeborne ffurste vnde here here Erik, van godes gnaden koningh der rike Denemarken, Sweden vnde Norwegen, ok hertog te Pomeren, vnde de irluchtigeste hochgeborne ffurstyne vnde vruwe vruw Philippa, koningyne der seluen gnaden, hebben gheghunt vnde toghelaten ene rechticheit vnde statute alse hyrna schreuen steit, vnde dat is ok gheschen mit witschop her Esge Brok, ridder, houetman des slotes to Kopenhauen, vnde vor dem gantzen rade der stad Kopenhauen, so ys dyt ghemaket vnde gedichtet in godes vnde in alle godes hilgen ere, vnde in sunte Loygen ere vnde van de beschedenen luden vp ghenomen de hir vormals to Kopenhauen goltsmede weren. Alse by Euerd Lunynghes tiden. Olaff goltsmedes. Werner goltsmedes. Mester Johans. Andreas Regenstens. Marqwardes. In de ere vnde dorch den vromen aller goltsmede:

1. Dat jewelik goltsmyt to Kopenhauen schal werken lodich suluer vnde gut golt; we des nichten doyt de bote to dem ersten der kumpanie ene mark lodich, doyt he dat to dem anderen male zo bote he twe mark lodich, doyt he dat tho dem derden male so botet he dre mark lodich. De dre mark schal men delen an dren, ene mark schal hebben des koninghes voghet. De anderen de raetlude. De derden mark den goltsmeden to Kopenhauen, darna schal de selqe de stad rumen.

2. Vortmer de goltsmede to Kopenhauen scholen kesen enen olderman eder twe, de der kumpanie van sunte Loyen ghilde scholen vore zeen, so we dar jegen sprekt wan yd eme boden wert, de bote ne halue mark syluers.

3. Vortmer we eghen werk werken wil, de schal hebben vyff mark lodiges syluers vnde touwe, dat werdich sy ene lodige mark sylvers, vnde dat sweren twe erlike mannes namen vort, so schal he der kumpanie gheuen ene tunne bers vnde ene mark wasses vnde licht vnde bekere, de men dar antworden schal.

4. Vortmer so en schal nyn goltsmyt to sik nemen jenigen knecht tho lerende, he en sy van echten luden vth gekomen. We dar en jeghen doyt, de betere ene lodige mark syluers, vnde de knecht schal vngelert bliuen.

5. Vortmer so we enen knecht nymt to lerende, de schal der kumpanie gheuen ene tunne bers [vnde sunte Loyen iij marck was].

II s.52

6. Vortmer schal nyn knecht maken eghen werk edder stuckewerk ane synes heren witschap, vnde vorhelet dat de here, zo betere de here ene halue lodighe mark, vnde de knecht ene tunne bers, vnde den knecht schal men vor knecht de beter nicht holden.

7. Vortmer nyn knecht schal maken stuckewerk edder wekeloen vordenen. So we yn sodanighen stucken ghevunden wert [so vakene alze he dat deyt] de betere veer mark wasses, deyt he dat myt des heeren wille, so betere he ene tunne bers [vnde de meister ok eyne tunne ber]. Wert dat werk ghevunden myt deme kechte, dat schal man doen in sunte Loygen bussen.

8. Vortmer so welk knecht myt synes heren lone enwech vore, vnde dar namals wedder qwerne, den zolde men vor knecht des de beter nicht holden vnde neman scholde den knecht tho sik nemen van vnser kumpanye. So we dat brekt, de beter ene mark lodich.

9. Vortmer denet en knecht synerne heren vp ene beschedene tiid vnde wil de knecht enwech varen vnde toghert de here deme knechte syn loen vore, vnde klaghet dat de knecht vor den oldermannen, so betere de here eyn lyspund wasses, dar tho so gheue he deme knechte syn loen.

Dyt recht hebbe wy vp ghenomen vor den ghemenen ratluden tho Kopenhauen.

10. Vorsumet en knecht synes heren werk, de oldermanes kesen(?) twe selues heren, wat se dar doet dat schal deme heren vnd deme knechte wol behaghen, so weme dat nicht behaghet, de gha vte der kumpanye.

11. Vortmer nyn sulues here sal myt den anderen drinken van vnser kumpanye in tauernen edder yn birbenken, So we dat deyt, de betere enen lodighe verdynk vp gnade.

12. Vortmer het en sulues here den anderen horensone, de betere ene lodigen verdink sunder gnade.

13. Vortmer sleyt en sulues here den anderen enen pust, he betere ene halue lodighe mark sunder gnade. Sleyt en here enen knecht, he betere enen lodighen verdink. Sleyt en knecht enen heren, he betere ene halue lodighe mark vnde sette enen borghen vor den broke.

14. Vortmer we eyn mest vp den anderen thuet van vnser kumpanye, dat sy war yd sy, he betere ene mark lodich. Thuet eyn knecht en mest vp den heren, dat sy wor id sy, he betere ene mark lodich sunder gnade vnde sette borghen vor den broke.

II s.53

15. Vortmer welk meister arbeidet vp sunte Loygen dach, zyn broke is ene tunne bers, vnde welk knecht arbeidet in denseluen daghe, zyn broke is ene halue tunne bers, vnde des junghen broke ene mark wasses.

16. Vortmer so worden se des to rade myt der ghemenen kumpanie, we enen junghen to sik neme vnde helde ene twelf vulle wekene vnde lete ene dar enbynnen nicht in der kumpanie rullen schriuen, de heft ghebroken vyff mark wasses, nochtan schal he der kumpanie yul doen vor den junghen.

17. Vortmer steruet eyn knecht, de suuerliken ghedenet heft, deme schal men doen alle dat recht dat men eyneme sulues heren doen schal, welk here des nichten doyt, de betere en ore.

18. Vortmer steruet eyn selues here edder syn husvrouwe, den schal men volghen to der graft alse der kumpanie rechts is, we des nichten doyt, de betere eyn ore. Vortmer steruet ene wedewe vth vnser kumpanie, der schal men doen alle dat recht, dat men enem selues heren don schal, we des nichten doyt, de betere eyn ore.

19. Vortmer so en schal nyn goltsmede knecht syn eghen man werden, he en hebbe en jar [scriff nicht] yn deme goltsmede werke to Kopenhauen ghedenet.

20. Vortmer to sunte Andreas daghe so schal de kumpanie tho hope drinken, dar schal sik eyn jewelik to der kumpanie to bereden. Des anderen daghes scholen se ok eyne selemissen hebben, dar scholen to offeren beide vrouwen vnde man, so we des nichten doyt, de betere eyn øre.

21. Vortmer de deme anderen to dem markede syne stede benympt, de betere ene tunne bers, komet dar jenighe qwade wort en tusschen, de dar brekt wert he ouer tughet, de betere twe tunne bers.

22. Vortmer so we in vnser kumpanie vor schult vorklaghet wert, ghift he eme dat nicht vp de seluen tiid, de eme ghezat is, de betere dre øre.

23. Vortmer so we den anderen van vnser kumpanie vp dat Raethws buth sunder der olderlude orloff, de betere dre mark wasses.

24. Vortmer schal nyn selues here deme anderen synen knecht entwynnen ane syne willen, we dat doyt, de betere eyn half lyspund wasses vnde de knecht ene tunne bers.

25. Vortmer so we syn eghene here werden will, de en schal syn bret nicht vort leggen, er he der kumpanie heft vul ghedan.

26. Vortmer we deme anderen enen beker bers vp dat houet

II s.54

ghut, de betere enen lodighen verdink. So we deme anderen enen beker bers in den schoet ghut, de betere veer mark wasses.

27. Vortmer so we vorholet enes anderen touwe, de betere ene tunne bers.

28. Vortmer so we des anderen knecht edder junghen locket to gheuende edder to vorkopende vte der boden van den dinghen, de in der boden zynt, ane des heren orleff, de betere eyn half pund wasses vnde wese en man de beter nicht.

29. Vortmer we to der steuene nichten kumpt, de betere en øre. So we ernstes modes vte der steuene gheit, der betere en tunne bers.

30. Vortmer zo en mach efte en schal nyn goltsmyt kranker golt arbeiden dan gut werk, gholt also gud he dat vntfanget. [scriff nicht.]

31. Vortmer zo en mach nyn goltsmyt nyn zuluer arbeiden id en sy gud werck suluer.

32. Ok is dat hiir en recht ghewesen van oldinghes her, dat men ghift van ener mark lodich de halue wycht, de dat wil wol ghemaket hebben vnuorghuldet, vnde vorguldet dat de mester mit synem eghenen golde, zo schal he hebben de ghantze wicht.

33. Ok is hiir en zede vnde en recht ghewesen van oldinghes, kumpt hiir vor jenighen meister goltsmede werk dat nicht rechtuerdich en is, dat schal he vp holden wente tho rechte.

Orig. paa en Pergamentsrulle i oldn. Museums Arkiv. Tidligere trykt i D. Mag. 3 R. I. 47-52. Hvad her er trykt med Kursiv, er samtidige Rettelser.

II s.55